ड्रिम्स’को दुई दिनको व्यापार एक करोड बहत्तर लाख

 शुक्रबारबाट देशव्यापी प्रदर्शनमा आउको चलचित्र ‘ड्रिम्स’ले दुई दिनमा नै आफ्नो लगानी सुरक्षित गरेको छ । प्रदर्शनको दिन शुक्रबारबाट नै प्रदर्शनमा आएका हलहरुमा हाउसफुल भएको ड्रिम्सले दोस्रो दिन शनिबारसम्ममा एक करोड बहत्तर लाखको कमाई गरेको छ ।

अनमोल केसीले अभिनय गरेको चलचित्र ‘ड्रिम्स’ ले शुक्रबार काठमाडौंबाट ३९ लाख र मोफसलबाट २८ लाखको ग्रस कलेक्सन गर्यो भने शनिबार दुई क्षेत्रबाट क्रमशः ६० लाख र ४५ लखको ग्रस कलेक्सन गर्न सफल भएको छ । यही अनुपातमा यो चलचित्रले व्यापार गरेको खण्डमा चलचित्रका निर्देशक एवं निर्माता भुवन केसीको खातामा खुद पाँच करोड रुपैयाँ पर्ने आँकलन छ ।

‘होस्टेल’ र ‘जेरी’ चलचित्रबाट दर्शक माझ स्टार नायकको रुपमा छवि बनाएका नायक भुवन केसीका छोरा अनमोल केसीले अभिनय गरेको चलचित्र ‘ड्रिम्स’ लाई भुवन केसीले नै निर्माण र निर्देशन गरेका हुन् ।

चलचित्रमा सामीप्यराज तिमल्सेनाको पटकथा, पुरुषोत्तम प्रधान र सन्जय लामाको छायांकन, हरकुलिश बस्नेत र विशेष पाण्डेको संगीत, बनिश शाह र मिलन श्रेष्ठको सम्पादन, चन्द्र पन्तको द्वन्द्व, कविराज गहतराजको नृत्य निर्देशन रहेको छ । यो चलचित्रमा अनमोलसँगै साम्राज्ञीराज्य लक्ष्मी शाह, सन्ध्या केसीको मुख्य भुमिका रहेको छ ।