बार्सिलोनाको शानदार सुरुवात, स्वारेजको ह्याट्रिक, मेस्सीले गरे दुई गोल

भदौ ५ – स्पेनिस ला लिगामा गएको वर्षको च्याम्पियन बार्सिलोनाले शानदार विजयी सुरुवात गरेको छ । शनिबार राति भएको यो सिजनको आफ्नो पहिलो खेलमा बार्सिलोनाले रियल बेटिसलाई ६–२ ले हरायो ।
बार्सिलोनाको जितमा लुइस स्वारेज नायक बने । उनले ह्याट्रिक गरे । यस्तै लियोनल मेस्सीले दुई तथा आरड तुरानले एक गोल गरे । तुरानले छैटौं मिनेटमा गोल गर्दै बार्सिलोनालाई सुरुवाति अग्रता दिलाए । २१ औं मिनेटमा रियल बेटिसका रुबेन कास्ट्रोले बराबरी गोल फर्काए । ३७ औं मिनेटमा मेस्सी तथा ४२ औं मिनेटमा स्वारेजले एक एक गोल गरेपछि पहिलो हाफमा बार्सिलोना ३–१ एकले अघि रह्यो । दोस्रो हाफमा पनि बार्सिलोनाले थप तीन गोल गर्यो । ५६ औं मिनेटमा स्वारेज तथा त्यसको एक मिनेटपछि मेस्सीले व्यक्तिगत दोस्रो गोल गर्दै बार्सिलोनाको अग्रता ५–१ बनाए । स्वारेजले ८२ औं मिनेटमा गोल गर्दै नयाँ सिजनको पहिलो खेलमा नै ह्याट्रिक पूरा गरे । ८४ औं मिनेटमा रियल बेटिसका कास्ट्रोले व्यक्तिगत दोस्रो गोल गरेपछि त्यो जितका लागि पर्याप्त भएन र बार्सिलोना ६–२ ले विजयी भयो । रातिनै भएको अर्को खेलमा स्पानियोललाई ६–४ ले हराएर सेभिल्लाले पनि विजयी सुरुवात गरेको छ । यस्तै ग्रनाडा र भिल्लारियलले भने १–१ को बराबरी खेले ।