तीन वर्षदेखि दशैँमा घर जान नपाएकी नर्सलाई बिरामीको हजुरआमाले जमरा लगाइँदिदा...

 - स्मिता काफ्ले, नर्स , त्रिवि शिक्षण अस्पताल
दशैँको रमाइलो सुरु भैसकेको छ । तर अस्पतालमा कर्यरत नर्सहरु भने दशैँको समयमा कुन बिरामीलाई कसरी हेरचाह गर्ने भन्ने चिन्तामा छन् । दशैँको टिकाको दिन होस् वा दशैँका अघिल्ला र पछिल्ला दिन नै किन नहोस् डिउटीमा रहेका नर्स बिरामी छाडेर निस्कँदैनन् । अस्पतालमा बिरामीसँग जतिबेला पनि सँगै रहने भनेको नर्स नै हुन् ।
सर्वत्र दशैँको रौनकले छोपेको समयमा नर्सको दशैँ कस्तो हुन्छ ? कसरी मनाउँछ भन्ने विषयमा त्रिवि शिक्षण अस्पतालमा कार्यरत नर्स स्मिता काफ्लेले आफ्नो अनुभव यसरी सुनाइन् । उनको अनुभव उनकै शब्दमा :
तीन वर्ष भयो दशैँ मनाउन म घर जान नपाएको । तीन वर्षदेखि नै टिकाको दिन पनि मेरो डिउटी परिरहेको छ । दशैँको टिकाको दिन घरमा आमाबुबासँग नहुँदा केही दुख त अवश्य लाग्छ । तर, जब अस्पतालमा बिरामीहरुको सेवामा लाग्छु ति दुख भुल्छु । बिरामीहरु पनि त घर नगई अस्पतालमा रोगसँग लडिरहेका हुन्छन् ।
अन्य समयमा भन्दा दशैँमा काम गर्न भने केही डर भने लाग्ने हुन्छ । अझ नाइट डिउटीमा थप डर लाग्छ । किनभने दशैँको समयमा अस्पतालमा बिरामीको संख्या अत्याधिक कम हुने र डाक्टर, नर्स तथा अन्य कर्मचारी पनि कम हुँदा एक्लै जस्तो डिउटी गर्नुपर्ने हुन्छ । दशैँको समयमा धेरै बिरामीहरु डिस्चार्ज हुने भएकाले सिकिस्त अवस्थाका बिरामी मात्र अस्पतालमा हुन्छन् । यस्ता बिरामीको संख्या निकै कम हुन्छ । तर कति बेला के हुने हो भन्ने डर भने रहिरहन्छ ।
डाक्टर तथा नर्सको संख्या कम हुने हुँदा डिउटीमा रहेकाले नै सबैजसो बिरामीलाई हेर्नुपर्ने हुन्छ । आकस्मिक पर्यो भने तुरुन्तै डाक्टरलाई फोन गरेर बोलाउनु पर्छ । सामान्यतया दशैँको बिदाको समयमा हाम्रो हाफ डिउटी हुन्छ । चार घण्टाको डिउटी समय रहन्छ । तर तीन वर्षदेखि नै टिकाको दिन गाँउ जान नपाएकाले मेरो दशैँ अस्पतालमा नै बिरामीसँगै हुन्छ । तीन वर्षदेखि कहिले पनि साइतमा टिका लगाउन पाएको छैन ।
अस्पतालमा काम गर्ने क्रममा एक पटक एक जना हजुरआमाले बिरामी नातीलाई भेट्न आउँदा मलाई पनि जमरा लगाइदिनु भएको छ । टिकाको साइतमा टिका लगाउन नपाए पनि ति हजुरआमाले लगाइदिएको जमराले छुट्टै खुसी मिल्यो । दशैँमा अस्पतालको शैयामा नै टिका लगाएको हेर्दै आएकी मलाई ति हजुरआमाले ‘घर पनि नगाई यती धेरै बिरामीको सेवामा लागेकी छौँ ल जमरा लगाउँ’ भन्दै लगाइदिनु भयो र आशिर्वाद पनि दिनु भयो । दिउसोको २ बजेतिर हो उहाँले मलाई जमरा लगाइदिनु भएको । उहाँको त्यो व्यवहारले मलाई भित्रबाट नै खुसी मिल्यो ।
तर, यो पटकको दशैँमा भने मैले बिदा पाएको छु । यो दशैँ भने आफ्नै गाँउमा पुगेर साइतमा नै टिका लगाउने तयारीमा छु । तीन वर्षपछि साइतमा टिका लगाउन पाउने भएपछि मन फुरुङ्ग भएको छ । मम्मी ड्याडी पनि हर्षित हुनुहुन्छ । मेरो डिउटी नपरे पनि अरु नर्सहरुको भने यस पटक डिउटी परेको छ । डिउटीमा रहेका अन्य नर्सहरुले विगतमा मैले बिरामीले बेडमा दशैँ मनाएको हेरेर खुसी भएझैँ खुसी हुने प्रयास गर्नेछन् ।स्वास्थ्य खबरपत्रिकाबाट