आइतबार बस्ने संसद बैठकमा संशोधन प्रस्ताव पेश गर्ने सरकारको तयारी

काठमाडौं–सरकारले आइतबार बस्ने संसद बैठकमा संविधान संशोधन प्रस्ताव पेश गर्ने तयारी गरेको छ। सो विषयमा शनिबार प्रधानमन्त्री पुष्पकमल दाहाल, कांग्रेस सभापति शेरबहादुर देउवा र मधेसी मोर्चाका नेताबीच अनौपचारिक छलफल भएको छ।
राष्ट्रिय मधेस समाजवादी पार्टीका अध्यक्ष शरदसिंह भण्डारीले प्रधानमन्त्री दाहाल र कांग्रेस सभापति देउवासँग टेलिफोन वार्ता गरेका छन्। टेलिफोन वार्तामा प्रधानमन्त्री र कांग्रेस सभापति देउवाले आइतबार बस्ने संसद बैठकमा संशोधन प्रस्ताव पेश गर्ने बताएको राष्ट्रिय मधेस समाजवादी पार्टीका महासचिव केशव झाले जानकारी दिए।
शनिबार नै तमलोपा वरिष्ठ उपाध्यक्ष हृदयेश त्रिपाठीले पनि प्रधानमन्त्री र कांग्रेस सभापतिसँग अनौपचारिक छलफल गरेका छन्। स्रोतका अनुसार शुक्रबार एमालेले राजधानीमा गरेको शक्ति प्रदर्शनपछि सत्तापक्षको तयारीका विषयमा मधेसी मोर्चाले सरकार र सत्तापक्षको धारणाबारे जानकारी लिएका थिए। प्रधानमन्त्रीले आइतबार बस्ने संसद बैठकमा संविधान संशोधन प्रस्ताव टेबल गर्ने बताएका थिए।