ट्रम्पको आदेशपछि आप्रवासी विमास्थलमै रोकिए, न्युयोर्कमा विरोध प्रदर्शन

न्युयोर्क। मेरिकामा विभिन्न देशबाट गएका आप्रबासीलाई विमानस्थलमा नै रोकिएको छ । राष्ट्रपति डोनाल्ड ट्रम्पले कट्टरपन्थी इस्लामिक विद्रोहीलाई अमेरिका बाहिर गराउने भन्दै जारी गरेको कार्यकारी आदेशपछि विभिन्न देशबाट आएका नागरिकलाई प्रभावित विमानस्थलमा नै रोकिएकोे हो ।

न्युयोर्कको जोन एफ केनेडी विमानस्थलमा ११ जना सिरियाली नागरिकलाई प्रहरीले रोकेका छन् । त्यसको विरोधमा अधिकारकर्मीले विरोध प्रदर्शन गरेका छन् । विभिन्न अधिकारकर्मी समूहले राष्ट्रपति डोनाल्ड ट्रम्पको आदेश मानवीयताको मूल्यमान्यता विपरित रहेको भन्दै विरोध प्रदर्शन गरिरहेका छन् । ट्रम्पले सिरियासहित सात इस्लामिक देशका नागरिकको अमेरिका आगमनमा कडाइ गर्न आदेश दिनुभएको हो । यसमा इरान, इराक, लिबिया, सोमालिया, सुडान र यमन छन् । जोन एफ केनेडी विमानस्थलमा रोकिएकाहरु ट्रम्पको कार्यकारी आदेश जारी हुन पूर्व नै बोर्डिङ पास लिएका व्यक्ति हुन् । यस्तै दुई जना इराकी शरणर्थीलाई पनि रोकिएको थियो । त्यसमध्ये एक जनालाई रिहा गरिएको छ भने अर्का एक जनालाई अझै छोडिएको छैन । विभिन्न अधिकारवादी संस्थाले आधारभुत मानवीय मूल्यमान्यतालाई कुल्चिन नमिल्ने भन्दै विरोध प्रदर्शन गरिरहेका छन् । उनीहरुले शरणार्थीलाई रोकिएको विरोधमा अदालतमा मुद्दा पनि दर्ता गरेका छन् । तर अहिलेसम्म यो स्पष्ट भएको छैन कि राष्ट्रपति ट्रम्पको आदेशको असर अमेरिकालाई के पर्ने छ ।