यी हुन् नम्रता श्रेष्ठ, जसले पार्दैछिन् २ नायकसँग ‘गाँठो’ -

नझुक्किनुहोस्, यी चलचित्र ‘क्लासिक’मा अभिनय गर्ने चर्चित नायिका नम्रता श्रेष्ठ होइनन् । हामी यहाँ अर्की नम्रता श्रेष्ठको कुरा गर्दैछौ, जसले चलचित्र ‘गाँठो’बाट चलचित्र क्षेत्रको यात्रा सुरुवात गर्दैछिन् ।

आजबाट पोखरामा छायांकन सुरु भएको चलचित्र ‘गाँठो’लाई सुरज भुषालले निर्देशन गर्दैछन् । सुरजले चलचित्र ‘र्‍याक गाइज’ लाई पोष्टपोन्ड गर्दै यो चलचित्रको छायांकन सुरु गरेका हुन् । पोखरा र गुल्मीमा करिब १ महिना लगाएर चलचित्रको छायांकन हुने सुरजले अनलाइनखबरलाई बताएका छन् ।

चलचित्रमा नाजिर हुसेन र अभय बराल मुख्य भूमिकामा देखिनेछन् । जसले ‘होस्टेल रिटन्र्स’बाट चर्चा कमाइसकेका छन् । चलचित्रले परिवार, प्रेममा हुने सम्बन्धको गाँठोको कुरा गर्ने सुरजको भनाई छ । बटवाल इन्टरटेन्मेन्टको ब्यानरमा तिलक क्षेत्रीसँग मिलेर सुरजले यो चलचित्र बनाउन लागेका हुन् ।

नम्रता श्रेष्ठ मोडलिङमा चर्चित नाम हो । जो अडिशनबाट यो चलचित्रमा जोडिन आइपुगेकी हुन् । अब, चलचित्र क्षेत्रमा २ जना ‘नम्रता श्रेष्ठ’ नाम गरेका नायिका भएका छन् । यसले कसलाई कती सजिलो र कसलाई अप्ठ्यारो हुने हो, भविष्यले नै बताउनेछ ।

- See more at: http://www.onlinekhabar.com/2016/03/397601/#sthash.xw3VxCxn.dpuf