विश्वकपमा बंगलादेशको विजयी सुरुआत

काठमाडौं, फागुन २६ । भारतमा जारी विश्वकप ट्वेन्टी–२० क्रिकेटमा बंगलादेशले विजयी सुरुआत गरेको छ ।

बंगलादेशले बुधबार नेदरल्यान्ड्सलाई ८ रनले हराएको हो । १ सय ५४ रनको चुनौती पछ्याएको नेदरल्यान्ड्सले ७ विकेटको क्षतिमा १ सय ४५ रनमात्र बनाउन सक्यो ।

यसअघि, धर्मशालामा भएको खेलमा पहिले ब्याटिङ गरेको बंगलादेशले तमिम इक्वालको ८३ रनको मद्दतले ७ विकेटको क्षतिमा १ सय ५३ रन बनाएको थियो ।

विश्वकपको ‘क्वालिफायर’को पहिलो दिनका खेलमा अफगानिस्तानले स्कटल्यान्डलाई तथा जिम्बाबेले हङकङलाई समान १४ रनले पराजित गरेको थियो । क्वालिफायरको समूह ‘ए’मा बंगलादेश, नेदरल्यान्ड्स, आयरल्यान्ड र ओमान तथा समूह ‘बी’मा हङकङ, जिम्बाबे, अफगानिस्तान र स्कटल्यान्ड छन् ।