बृद्धभत्ता बढेपछि जेष्ठ नागरिकको आन्दोलन स्थगित

शनिबारको बजेट भाषणामा सामाजिक सुरक्षा भत्ता वृद्धिको घोषणासँगै जेष्ठ नागरिकहरुले ३९ महिना लामो आन्दोलन अन्त्य गरेका छन् ।

जेष्ठ नागरिकहरुले सामाजिक सुरक्षा भत्ता १ हजारबाट बढाएर २ हजार पुर्‍याइएको खुशियालीमा आइतबार ३९ महिना लामो आन्दोलन अन्त्य गरेका हुन् ।

सामाजिक सुरक्षा भत्ता ५ हजार पुर्‍याइनुपर्ने, सार्वजनिक यातायात र सरकारी अस्पतालमा उपचार खर्च छुट दिइनुपर्ने लगायतका माग राखेर धर्ना बस्दै आएका जेष्ठ नागरिकहरुले सामाजिक सुरक्षा भत्ता २ हजार रुपैयाँ पुर्‍याएकामा सरकारलाई धन्यवाद दिएका छन् ।

अन्य दिन आफ्ना मागसहित सरकारको विरोधमा नाराबाजी गर्दै आएका जेष्ठ नागरिकहरुले आइतबार यातायात व्यवस्था विभागको परिसरमा सरकारको जयजयगान गाए । उनीहरुले प्रधानमन्त्री केपी शर्मा ओली अमर रहुन् भनेर नारा लगाए ।

सामाजिक सुरक्षा भत्ता दुई हजार पुर्‍याइएकामा जेष्ठ नागरिकहरु निकै खुशी देखिए । उनीहरुले आफ्नो आन्दोलनको दवाबस्वरुप सरकारले भत्ता बढाएको भन्दै आपसमा माला र खादा साटासाट गरेर खुशी बाँडेका छन् ।

जेष्ठ नागरिकहरुले आफ्ना माग आंशिक रुपमा पूरा भएको भन्दै तत्कालका लागि मात्र धर्ना अन्त्य गरेको बताए । उनीहरुले माग आंशिक रुपमा पूरा भएको खुशियालीमा मेची महाकाली यात्रामा निस्किने र देशभरका जेष्ठ नागरिकहरुसँगको सल्लाहका आधारमा आन्दोलनका कार्यक्रम तय गरिने बताए ।

संयुक्त जेष्ठ नागरिक संघर्ष समितिका नाममा जेष्ठ नागरिकहरु २०६९ सालको फागुन २४ गतेदेखि काठमाडौको मिनभवनस्थित यातायात व्यवस्था विभागको परिसरमा धर्ना बस्दै आएका थिए ।