मानवीय सहायताका लागि अमेरिकी सेनाको टोली दोलखामा

भूकम्पपछिको उद्धारकै क्रममा गतवर्ष हेलिकप्टर खसेर आफ्ना सहकर्मी गुमाएको दुःखद घटनाको स्मरण गर्दै अमेरिकी सेनाको टोली पुनः मानवीय सहायताका लागि दोलखा आएका छन् ।
उनीहरु अपरान्ह सदरमुकाम चरिकोट आइपुगेर सिधै सुन्द्रावती गाविस गएका छन् । उनीहरु पर्यटक बसमा आएका हुन् । 'बाँकी दिनहरु सुन्द्रावतीमा वित्नेछन्,' उनीहरुमध्ये एकजना नेपाली भाषा बोल्नसक्ने सैनिकले बताए ।
२०७२ बैशाख २९ गते दोलखा इपिसेन्टर परेर भूकम्प गएपछि सिंगटीबाट घाइते लिएर उद्धार गर्न उडेको अमेरिकन सेनाको क्रोप्स युएच १ वाइ हुवे हेलिकप्टर दुर्घटना भएको थियो । दुर्घटनामा दोलखा र सिन्धुपाल्चोकको सिमानामा ६ अमेरिकन सैनिकसहित १३ जनाको निधन भएको थियो । त्यसैको स्मरणमा अमेरिकास्थित पेन्सन भेनियाबाट आएका अमेरिकी क्यारेट टोली दोलखामा सेवा गर्न आएको सैनिक स्रोतले जनाएको छ । भाडाको मिनिबसमा आएका उनीहरु सामान्य अमेरिकन नागरिकसरह आएका छन् । उनीहरु चढ्ने बसको छतमा एक पाङ्ग्रे सामाग्री ओसार्ने हाते गाडाहरु छन् ।
काठमाडौं २ दिन बसेर सोमबार दोलखा आएका टोलीमा ३५ जना भएको जानकारी चरिकोटस्थित रणभीम गणले पाएको छ । उक्त गणले पाएको सूचनामा दोलखाको 'सुन्दर वस्ती'मा असार ३ गतेसम्म रहने छ । सुन्दर वस्ती भनेर उधृत गरिएको ठाउँ सुन्द्रावती गाविस भएको रणभीम गणले एकिन गरेको छ । 'किननी करिब २ महिना अघि २/३ जना उक्त क्यारेटका सेनाहरु सुन्द्रावतीमा रेकी गरेर फर्किएका थिए,' गणको भनाई छ ।
प्रमुख सेनानीको नेतृत्वमा आएको उक्त टोली असार ३ गतेसम्म दोलखामा बसेर विद्यालय भवन बनाउने प्रमुख कार्य गर्ने छ । सोमबार चरिकोटमा भेटिएका टोलीका सदस्यले कान्तिपुरलाई बताए । र्फकनेवित्तिकै ५ गते स्वेदश फिर्ने तालिका नेपाली सेनालाई बुझाएका छन् । तालिकामा केही सदस्य आउने सोमबार काठमाडौं धुम्बराईस्थित इष्टिच्यूट अफ क्राइसिस मेनेजमेन्टमा अन्तरकृयामा सहभागी हुने छन् ।
भूकम्पको इपिसेन्टर परेको सुनखानीको छिमेकी गाउँ सुन्द्रावतीमा उनीहरु १७ दिन वस्ने छन् । दुर्घटनाग्रस्त हेलिकप्टरले अन्तिम उडान सुनखानीको छिमेकी बजार सिंगटीबाट गरेको थियो । दुःखद घटनाको कारण बनेको स्थानको छेऊछाऊ अमेरिकन सेनाहरुले विद्यालयमा सेवा गर्ने छन् । भूकम्पले आहत मानिसहरुलाई मनोरञ्जन दिलाउने जस्ता कार्यसमेत गर्ने छन् ।