श्रीकृष्णको सम्झनामा श्वेताले गरिन् अनाथ आश्रमलाई सहयोग

काठमडौं, पुस १४ – अभिनेता श्रीकृष्ण श्रेष्ठको बिहीबार जन्म जयन्ती हो । सिनेमा क्षेत्रमा स्थापित अभिनेता श्रीकृष्णले संसार छाडेको दुई वर्ष भइसक्यो । २०२४ साल पुस १४ गते जन्मेका उनी २०७१ को साउन २४ गते यो संसारबाट बिदा भएका थिए ।
श्रीमान्को जन्मजयन्ती पारेर अभिनेत्री स्वेता खड्काले एक अनाथ आश्रमलाई सहयोग गरेकी छिन् । धुम्बाराहीस्थित १९ जना अनाथ बालबालिका रहेको घर आँगन नामक अनाथ आश्रमलाई स्वेताले एक लाख ५० हजार रुपैयाँ सहयोग गरेकी हुन् ।
स्वेताको सहयोगमा नयाँ भवन बनाउने तयारीमा रहेको संस्थाको जग हाल्नका लागि उक्त रकम खर्च गर्ने जनाएको छ । अनाथ आश्रमलाई सहयोग गरेकी स्वेताले यो काम स्वर्गीय पति श्री कृष्णकै लागि गरेकी हुन् । समाज सेवा भनेपछि हुरुक्कै हुने श्रीकृष्ण बिहीबार स्वेताको यो काम देखेर खुसी होलान् भन्नेमा स्वेता विश्वस्त छिन् । काठमाडौंमा आयोजित एक कार्यक्रममा छक्का पञ्जाकी निर्देशक दीपा श्री र स्वेताले घर आँगनका सञ्चालक दीपक सिलवालाई रकम हस्तान्तरण गरेका थिए ।