मन्दिर सञ्चालननार्थ २ लाख रुपैयाँ प्रदान

झापा दुहागढी ४ का समाजसेवी बयोवृद्धा खडानन्द बास्कोटाले स्थानीय श्री दुर्गा पाञ्चायन मन्दिर सञ्चालननार्थ २ लाख रुपैयाँ प्रदान गरेका छन् ।
श्री दुर्गा पाञ्चायन मन्दिर संरक्षण समितिद्धारा आयोजित प्रारम्भिक साधारणसभा आयव्यय सार्वजनिक कार्यक्रममा बास्कोटाले स्वर्गीय माता पिता महानन्द र रोहिणी बास्कोटाको नाममा मन्दिरको अक्षयकोषका लागि उक्त रकम प्रदान गरेका हुन् । मन्दिर सञ्चालनमा आर्थिक समस्य आएपछि उनले समितिका अध्यक्ष हर्कबहादुर भट्टराईलाई उक्त रकम हस्तान्तरण गरेका थिए ।
यसअघि वयोवृद्धा बास्कोटाले मन्दिरमा देवीको मूल्यवान् मुर्ति स्थापना गरेका थिए । दुहागढी ४ मा २०३४ सालमा स्थापना गरिएको दुर्गा पाञ्चायन मन्दिर चारआली प्रहरी चौकी छेउमा रहँदा त्यसको संरक्षणको अभाव भएको थियो ।
स्थानीय सामाजसेवीले दुहागढी गाविसले चारआली आइतबारे हाटबजार परिषरभित्र करिव १ कठ्ठा जग्गा मन्दिरलाई उपलब्ध गराएपछि सो स्थानमा मन्दिर निर्माण गरिएको छ । मन्दिरकोे चौतर्फी संरक्षणमा स्थानीयवासीले संरक्षण समिति नै गठन गरी त्यसको विद्यान समेत दर्ता गरेको संरक्षण समितिका उपाध्यक्ष मोहन अधिकारीले जानकारी दिए ।
सो स्थानको सबै भन्दा पुरानो धार्मिक मन्दिरको रुपमा परिचित दुर्गा पाञ्चायन मन्दिरमा विगत वर्षदेखि नै वर्सेनि वडादशैंमा ऐतिहासिक मेला लाग्दै आएको छ । मन्दिरको संरक्षणसँगै त्यसको दीगो विकासका लागि समितिले ठोस कार्यक्रम ल्याउने बताएको छ । करिव १० धुरमा रहेको मन्दिरको अगाडी खाली १० धुर जग्गामा टहरा निर्माण गर्ने र सभाहलको रुपमा विकास गर्ने समेत समितिको ध्यान खिचेको छ ।
दुहागढी ४ र ५ का लगभग २ हजारबढी धर्मानुरागीले सो मन्दिरमा पूजाआरधना गर्दै आएको अध्यक्ष भट्टराईले बताए । उनका अनुसार मन्दिरलाई मन्दिरको रुपमा मात्रै नभई त्यसको सञ्चालनमा आवश्यक पर्ने आर्थिक जोहका लागि टहरा निर्माण गर्ने योजना बनाएको हो ।
आगमी दिनमा अक्षयकोषलाई बढाएर १० बनाउने योजना रहेको छ । हर्कवहादुर भट्टराईको अध्यक्षतामा सम्पन्न प्रारम्भिक साधारणसभामा माओवादी केन्द्र दुहागढीका अध्यक्ष बाबुलाल सुब्बा, कुमार भट्टराई, नेपाली कांग्रेसका अध्यक्ष सन्तोष न्यौपाने, राप्रपा नेपालका अध्यक्ष बद्री महत, समाजसेवी नेत्रप्रसाद न्यौपाने, खड्गबहादुर कार्की, खम्बासिंह कार्कीलगायतले मन्दिरको संरक्षणमा सबैको ध्यान जान जरुरी रहेको उल्लेख गरे । मोहन खतिवडाले स्वागत गरेको कार्यक्रमको सञ्चालन यामाकान्त पौडेलले गरेका थिए ।