आर्यन घरकै मान्छे हुन्, दोश्रो मान्छेका कारण हाम्रो सम्बन्ध बिग्रियोः रेखा थापा

'कसले चोर्यो मेरो मन २'को पहिलो हकदार आर्यन नै
उमेर बढेसँगै नायिका रेखा थापामा पनि परिवर्तन आएको छ । ३० बर्षको उमेरमा लाग्दाको समयमा नै रेखाले आफूमा बालपन सकिएको बताएकी थिइन् । उनै रेखा अब आफूले कुनै समय दुश्मन मानेका कलाकारसँग चलचित्र खेल्न कुनै आपत्ती नहुने बताउन थालेकी छिन् ।

रेखाले इमेज टेलिभिजनको कार्यक्रम ‘पेज थ्री’सँग कुरा गर्दै आफूहरुकै गल्तीका कारण यो कलाकारसँग काम गर्छु र योसँग गर्दिन भन्ने चलन आएको बताइन् । रेखाले यसो गर्दा चलचित्र नगरिलाई घाटा भएको भन्दै अवुझ भएका कारण यस्तो गरिएको बताइन् । रेखाले भनिन्-‘ अब म ठूली भएँ, मैले वुझे कि दर्शक हिट जोडी हेर्न आतुर छन् । यस्तो परिपाठीको अब अन्त्य हुनुपर्छ ।’

हिजोका दिनमा जोसँग नङ मासुको सम्बन्ध थियो, समयको कारणले मनमा रीस, आवेग पलाएको भन्दै रेखाले अब यसलाई निरन्तर राख्न नहुने बताइन् । रेखाका अनुसार नायक आर्यन सिग्देलसँग उनको कुनै तुष छैन । रेखाले खुला दिलका साथ भनिन्-‘हामीलाई दोश्रो मानिसले बिगारेको हो । मेरो त आर्शिवाद सधै उमाथि छ । हामी अरुका कारण बच्चा जस्तो भयौं र काम गर्दिन भन्न थाल्यौं । अरुलाई फाइदा भएपनि उसलाई र मलाई भने घाटा भयो ।’

आफूहरुले अरुको कुरा सुन्नु नै गल्ती भएको रेखाको भनाई छ । अहिले पनि दर्शकले ‘कसले चोर्यो मेरो मन २’को प्रतिक्षा गरेको भन्दै रेखाले यो चलचित्रको सिक्वेल बनेको खण्डमा पहिलो हकदार आर्यन नै हुने बताइन् । आर्यन घर भित्रकै सदस्य भएको भन्दै रेखाले काम गर्ने संभावना रहेको खुलाइन् ।

आर्यनलाई चलचित्र ‘किस्मत’बाट डेब्यू गराउँदा आफ्ना आँखामा उसको चकलेटी अनुहार परेको भन्दै नम्बर १ नायिकाले आर्यनको मात्र नभएर कसैले कसैको स्थान खोस्न नसक्ने बताइन् । उनले आर्यनमा क्षमता भएको र उनलाई आफुहरुले स्थान मात्र दिएको स्पष्ट पारिन् । रेखाले भनिन्-‘हाम्रो धर्म भनेको अभिनय गर्ने हो । हामीले दर्शकलाई निराश बनाउन मिल्दैन । क्यामेराको अगाडि हामीले काम गर्नुपर्छ, भलै बोल्न मन नलागे क्यामेरा पछाडि नबोल्दा हुन्छ ।

’
चलचित्र ‘कसले चोर्यो मेरो मन’ पछि नायिका रेखा थापा र नायक आर्यन सिग्देलको सम्बन्ध पानी बाराबारको अवस्थामा छ । रेखा र आर्यन एकसाथ चलचित्र खेल्नु त परको कुरा, बोल्दा पनि बोल्दैनन् । यस्तो अवस्थामा रेखा थापाको यो भनाइले अब यी दुइविच बोलचाल हुने संभावना बढेको छ । हेरौ, यसलाई आर्यनले कसरी लिने हुन् ?