देश विकासको अर्जुनदृष्टि मसँग मात्रः बाबुराम

काठमाडौँ: पूर्वप्रधानमन्त्री एवम् नयाँ शक्ति नेपालका संयोजक डा.बाबुराम भट्टराईले देश विकासको अर्जुन दृष्टि आफूसँग मात्र भएको बताएका छन् ।
पार्टी घोषणा सभालाई दशरथ रंगशालामा सम्बोधन गर्दै भट्टराईले महाभारतको कथालाई जोडेर देश विकासको अर्जुन दृष्टि आफूसँग मात्र भएको दाबी गरेका हुन् ।
पाँच पाण्डव र गुरु द्रोणचार्यको धनुवाण अभ्यासको कथा भन्दै बाबुरामले अर्जुन दृष्टिको चर्चा गरेका हुन् ।
दोणचार्यले चरो रुखा राखेर पाँच पाण्डवलाई धनुवाणको तालिम दिएको र चरो रुमा राखेर पाँचै पाण्डवको दूरदृष्टि जाँचेको बताए । चरोलाई कसैले हाँगो, कसैले पात, कसैले रुख भनेको तर अर्जुनले चाहिँ चराको आँखा देखेको चर्चा गर्दै अर्जुन चरो खसाल्न सफल भएको उल्लेख गरे ।
भट्टराईले माथिको प्रशंग जोड्दै अहिले नेपालको समृद्धिका लागि अर्जुन दुष्टि आवश्यक भएको बताए । उनले भने, ‘त्यसैले आज अर्जुन दृष्टिको चर्चा हुन्छ । आजको नेपाललाई आर्थिक समृद्धि र विकासमा लान हामीले अर्जुन दृष्टि लगाउनुपर्छ ।'
भूगोलले मात्र देश बन्दैन
बाबुरामले भूगोलले मात्र देश नबन्ने बताउदै राजनीतिक अधिकारले जनतालाई सम्पन्न बनाउनुपर्नेमा जोड दिए ।
उनले भौगोलिक एकीकरणले घरको जग निर्माण भएको लोकतान्त्रिकरणले पिलरको काम गरेको र अब भित्ता र छानु हाल्नुपर्ने आवश्यकता औँल्याए ।
‘भित्ता र छानो हाल्न नसकेसम्म देश बन्न सक्दैन् । छानो र भित्ता नभएको घरमा बस्न नसकेर युवा विदेश जान बाध्य छन् । यिनै कुरालाई केन्दैमा राखेर हामीले नयाँ शक्ति घोषणा गरेका छौँ,' बाबुरामले भने ।
सुनको छाना र गजुरसहितको सुन्दर नेपाल बनाउछु
त्यस्तै, बाबुरामले पृथ्वीनारायण शाहदेखि भीमसेन थापासम्मले भौगोलिक एकीकरण गरेको देशलाई सुनको छाना र गजुर हालेर सुन्दर बनाउने बताए ।
भट्टराईले भने, ‘भौगोलिक रुपमा एकीकरण भएको घरमाथि सुनको छाना र सुनको गजुर हालेर सुन्दर नेपाल बनाउनु पर्छ । त्यसका लागि नयाँ शक्ति घोषणा भएको छ ।'
बाबुरामले निर्वाचन आयोगमा संख्या थप्न मात्र पार्टी घोषणा नभएको समेत स्पष्ट पारे । ‘निर्वाचन आयोगमा १८० पार्टी छन् । नयाँ शक्ति नेपाल थप १ पार्टी मात्र होइन् । यो वैकल्पिक सोच र संस्कृतिको एक अभियान हो,' बाबुरामले भने ।
बाबुरामले सार्वजनिक स्थलमा हजारौँको उपस्थितिका बीच पार्टी घोषणा संसारमा कतै नभएको समेत बताए । भट्टराईले नयाँ शक्ति घोषणामा साक्षी बस्न पाउने सबै भाग्यमानी भएको दाबी गरे ।
बाबुरामले युवालाई देशमै रोजगारी दिने बताउँदै भने, ‘तपाईंहरुसँग काँधमा काँध मिलाएर अगाडि बढ्न चाहन्छु ।'
उनले युवालाई देशमा रोजगारी दिन नसके राष्ट्रियता नरहने बताउँदै भने, ‘हामीले हाम्रा युवा र छोराछोरीलाई देशमा रोजगारी दिन सकेनौँ भने यो देश बुढाखाडा मात्र बस्ने दशे बन्छ र राष्ट्रियता खतरामा पर्छ ।'
२५ वर्षमा नेपाल संसारकै धनी देश बनाउँछौँ
पूर्वप्रधानमन्त्री समेत रहेका भट्टराईले आफ्नै जीवनकालमा २५ वर्षभित्र नेपाललाई संसारकै धनी देश बताउने घोषणा गरे ।
उनले संसारकै धनी देश बनाउने भिजन र सोच नयाँ शक्तिसँग भएको समेत दाबी गरे । उनलेभ भने, ‘विकास र समृद्धिका लागि चाहिने भिजन र सोच हामीसँग छ ।'
बाबुरामले युवालाई देशमा राख्न सके नेपाल संसारकै धनी देश बनाउन सकिने दाबी गरे । ‘१५ देखि ४० वर्षका ४० प्रतिशत युवाशक्तिलाई नेपालमै रोजगारी दिनसके नेपाल संसारकै धनी हुन्छ,' बाबुरामले भने ।
विकास भौतिक सुख मात्रै नभएको भन्दै उनले भने, ‘हाम्रो विकास भौतिक सुखमात्रै होइन् आर्थिक विकास पनि हुन्छ ।'
राजनीतिक स्थिरता र शान्ति भएन भने विकास र समृद्धि नहुने बाबुरामको दाबी छ । उनले नेपाल आदिवासी, जनजाति, खस आर्य र मधेसी थारु मिलेर नेपाल बनेको बताए ।
कार्यकारी राष्ट्रपतीय प्रणालीले मात्र स्थिरता
बाबुरामले प्रत्यक्ष निर्वाचित राष्ट्रपतीय प्रणालीमा गएमात्र नेपालमा राजनीतिक स्थिरता रहने बताए । बाबुरामले भने, ‘प्रत्यक्ष राष्ट्रपतीय प्रणालीले मात्र देशमा राजनीतिक स्थिरता हुन्छ । राजनीतिक स्थिरता भए मात्र देश बनाउन सकिन्छ ।'